सुनसरीको रामधुनी वडा नम्बर तिनकी आठ वर्षीया बालिकालाई बलात्कार गरेको आरोप लागेका पुरुष दुई लाख धरौटीमा धरौटीमा रिहा भएका छन् ।
सोही स्थानका २२ वर्षीय विश्वमणि आचार्यले छिमेकी बालिकालाई पटकपटक बलात्कार गरेको घटना सार्वजनिक भएपछि गत फागुन १९ गते उनलाई प्रहरीले पक्राउ गरेको थियो ।
उक्त घटना सार्वजनिक भएपछि त्यसबेला पीडित बालिकाका २८ वर्षीय बुवाले आत्महत्या समेत गरेका थिए ।
प्रहरीमा परेको जाहेरी अनुसार बालिकालाई मोबाइल दिने र पैसा दिने बहानामा पटकपटक आचार्यले बलात्कार गरेका थिए ।
पछिल्लो पटक पुष १८ गते बलात्कृत भएपनि कसैलाई सुनाए मारिदिने धम्की दिएकाले पीडितले घटना लुकाउन बाध्य भएको उजुरीमा उल्लेख छ ।
तर, असह्य पीडाका कारण पीडित बालिकाले आफ्ना दाजुलाई सुनाएपछि घटना भएको दुई महिनापछि गत फागुन १९ गते मात्रै बलात्कारको घटना सार्वजनिक भएको थियो ।
जिल्ला अदालत सुनसरीले आचार्यलाई गत चैत्र १७ गते पुर्पक्षमा थुनामा पठाउन आदेश दिएको थियो ।
त्यसविरुद्व आचार्यपक्षले उच्च अदालत विराटनगरमा बैशाख २३ मा निवेदन दियो ।
निवेदन उपर सुनुवाई गर्दै न्यायधीशद्वय कृष्णकमल अधिकारी र मुरारीबाबु श्रेष्ठको इजलाशले जेठ १९ गते (बिहीबार) आचार्यलाई दुई लाख धरौटीमा छोड्न आदेश दिएको हो ।
BACK TO TOP
