चार बर्सिया बालिका बलात्कार गरेको आरोपमा जिल्ला प्रहरी कार्यालय पर्वतले एक जनालाई पक्राउ गरेको छ । जिल्ला प्रहरी कार्यालय पर्वतका प्रमुख प्रहरी नायव उपरीक्षक शिवराज बुढाथोकीका अनुसार म्याग्दीको बेनी नगरपालिका–४ घर भई हाल पर्वतको जलजला गाउँपालिका–३ वारी बेनीमा डेरा गरी बस्दै आएका २२ वर्षीय सन्देश छिनाललाई नियन्त्रणमा लिइएको हो ।
प्रहरीका अनुसार छिनालले जबरजस्ती करणी गरेपछि बालिका बेहोस अवस्थामा रहेको वेलामा आफन्तले फेला पारेर उपचारका लागि बेनी अस्पताल म्याग्दी लगे आफन्तले बताएपछि प्रहरीले घटनाको विषयमा अनुसन्धान सुरु गरेको थियो ।
घटनाको बारेमा सूचना पाए लगत्तै प्रहरी चौकी वारी बेनीका प्रहरी सहायक निरीक्षक बिराज ढकालको नेतृत्वमा पुगेको प्रहरीको टोलीले छिनाललाई वैशाख ८ गते नियन्त्रणमा लिएको हो । प्रहरी नियन्त्रणमा रहेका उनलाई शुक्रवार करणीसम्बन्धी कसुरअन्तर्गत जबरजस्ती करणीको मुद्दा दर्ता गरी पर्वत जिल्ला अदालतबाट पहिलो पटक १० दिनको म्याद थप गरेर अनुसन्धान भइरहेको प्रहरीले जनाएको छ ।
BACK TO TOP
