थप कार्यविधि बनाएर विकासका गतिविधि अघि बढाउन नसकिएको भन्दै मोरङको उर्लाबारी नगरपालिकाका मेयर खड्ग फागोले सरकारी गाडी फिर्ता गरेका छन् ।
फागोले आफूले चढ्दै आएको को १ झ ५७० नम्बरको गाडी नगरपालिकालाई नै फिर्ता दिएको घोषणा शनिवार पत्रकार सम्मेलनमार्फत गरेका हुन् । उनी काङ्ग्रेसबाट मेयरमा निर्वाचित भएका थिए । एमालेबाट निर्वाचित उपमेयर लक्ष्मीदेवी भण्डारीसहित बहुमत कार्यपालिका सदस्यले विकासका योजना अघि बढाउन नदिएपछि नैतिक रूपमा अप्ठेरो परेकाले गाडी फिर्ताको निर्णय लिएको फागोले बताए ।
उर्लाबारी नगरपालिकाको कार्यपालिका बैठक गत चैत १६ गते बोलाइएको थियो । नेकपा एमालेबाट निर्वाचित भएकाहरूले नमानेपछि बैठकमा प्रस्तुत भएका प्रस्तावका बारेमा कुनै निर्णय हुन नसकेको जानकारी उनले दिए । उनका अनुसार बैठकमार्फत कार्यविधि निर्माण गरेर ६ करोड ३७ लाखको सञ्चित कोषको बजेटबाट विकास निर्माणका कामलाई अघि बढाउने योजना थियो ।
‘कार्यविधि बनाएर प्रत्येक वडामा सडक कालोपत्रेका लागि ३० लाखका दरले रकम छुट्टाउने योजना थियो । सञ्चित कोषको बजेटबाट विकासलाई अघि बढाउन खोजेका थियौँ,’ मेयर फागोले भने, ‘एमालेबाट निर्वाचित जनप्रतिनिधिले नदिएकाले बैठकबाट निर्णय गर्न सकिएन । जसका कारण विकासका काम रोकिएपछि सरकारी गाडी चढेर हिँड्नु उपयुक्त लागेन।’
BACK TO TOP
