धरानमा भएको महिलाको हत्या प्रकरणका आरोपी २४ वर्षीय युवक पक्राउ

पाँच दिनअघि धरानको बुद्धचोकस्थित न्यु कान्तिपुर होटेल एन्ड गेस्ट हाउसमा पाँचथर घर भएकी ३९ बर्सिया सुमित्रा तामाङ मृत फेला परेकी थिइन् । उनको हत्यामा संलग्न भएको आरोपमा प्रहरीले धनकुटाको पख्रिबास नगरपालिका ६ फलाटे घर भएका २४ वर्षका दिनेश राना मगरलाई पक्राउ गरेको हो ।

महिलाको हत्यामा संलग्नको खोजी गर्ने क्रममा मगरलाई पक्राउ गरिएको इलाका प्रहरी कार्यालय धरानका डिएसपी नरेन्द्र कुँवरले जानकारी दिएका छन् । शनिवार छथर जोरपाटी गाउँपालिकास्थित ससुराली घरबाट दिनेशलाई पक्राउ गरिएको प्रहरीले जनाएको छ ।

इटहरीमा बस्दा चिनजान भएपछि तामाङसँग मगर नजिकिएको प्रहरी अनुसन्धानबाट खुलेको छ । पछिल्लो समय उनी भोजपुरमा बसेर डोजरको सहचालक भएर काम गर्दै आएका हुन् । उनीहरूबिचको सम्बन्धमा खटपट सुरु भएपछि दिनेशले हत्या गरेको प्रहरीले जनाएको छ । 

पाँचथर मिक्लाजुङ १ की ३९ बर्सिया तामाङ हाल इटहरी ५ तुलसा टोलमा बसोबास गर्दै आएकी थिइन् ।