इटहरी नगर गौरवको दोस्रो ठुलो योजनाको शिलान्यास, १५ करोड बढी लागतमा सुविधा सम्पन्न विद्यालय बनाइँदै

दिप खबर
फाल्गुन १७, २०७८

इटहरी उपमहानगरपालिकाको नगर गौरवको दोस्रो ठुलो योजना अन्तर्गत कचना वुढिगंगा स्कुल इटहरी ४ को छात्रावास सहितको सुविधा सम्पन्न भवन निर्माण सुरु गरिएको छ । इटहरी उपमहानगरपालिका प्रमुख द्धारिकलाल चौधरीले भवनको आज (मङ्गलवार) शिलान्यास गरेका हुन् ।

१५ करोड ४४ लाख ७७ हजारका लागतमा दुई वर्षभित्रमा छात्रावास सहितको तीन तले भवन निर्माण हुने उपमहानगरका वरिष्ठ इन्जिनियर जीवन घिमिरेले जानकारी दिए । भवन शिलान्यास कार्यक्रमलाई सम्बोधन गर्दै नगरप्रमुख चौधरीले आफ्नो कार्यकालमा इटहरीको भौतिक पूर्वाधार विकासमा इटहरीले चौतर्फी फड्को मारेको बताए ।

उनले इटहरी बासिन्दाको उल्लेख्य सहयोगमा इटहरीका जनप्रतिनिधिले सम्वृद्धिको अगुवाइ गरेको बताए । आफ्नो कार्यकाल सकिन अब ७४ दिन रहेको बताउँदै दैनिक नै नयाँ कामको शिलान्यास तथा निर्माण सम्पन्न कार्यको उद्घाटन गर्ने बताए । इटहरीवासीले गाँस काटेर दिएको करबाट इटहरीले काँचुली फेरेको समेत उनको भनाई छ ।
उपप्रमुख लक्ष्मी गौतमले छात्रावास सहितको अत्याधुनिक सामुदायिक विद्यालय यो सुनसरीमै पहिलो हुने दाबी गरिन् । आफ्नो कार्यकालमा भवन निर्माण तथा सडकमा उल्लेखनीय प्रगति गरेको बताइन् । उनले सबै वडामा स्वास्थ्य चौकी निर्माण, वडा भवन निर्माण जस्ता जनतालाई सहज हुने कार्य गर्न पाउँदा खुसी व्यक्त गरिन् । कार्यक्रममा बोल्दै उपप्रमुख गौतमले यो इटहरी उपमहानगरको शैक्षिक क्षेत्रको फरक र महत्त्वपूर्ण गौरवको कार्यक्रम रहेको बताइन् ।

शिक्षा सेवी लेखनाथ घिमिरेले यति ठुलो योजनाका लागि पहल गर्ने इटहरी उपमहानगरपालिकाका जनप्रतिनिधिप्रति आभार व्यक्त गरे । इटहरी उपमहानगरपालिकाको पहलमा राष्ट्रिय योजना आयोग मार्फत सङ्घीय सरकारको विशेष अनुदानमा उपमहानगरपालिकाको दश प्रतिशत लगानी थप गरी भवन निर्माण हुने छ ।

थप समाचार

प्रतिक्रिया

ताजा अपडेट

ट्रेन्डिङ

BACK TO TOP