उदयपुरको त्रियुगा नगरपालिका–१२ त्रियुगा बसपार्क नजिक विद्युत् सर्ट भई आगलागी हुँदा एक घर सहित तीन वटा पसल जलेर नष्ट भएको छ । बाबुराजा प्रजापतिको घर र त्यसमा रहेका तीन वटा पसल जलेर खरानी भएको जिल्ला प्रहरी कार्यालय उदयपुरले जनाएको छ ।
प्रजापतिको घरमा पसल गर्ने मदन साहको किराना पसल, जनक मगरको स्टिकर पसल र सरोज रेग्मीको मोटर पार्टस पसल जलेर नष्ट भएको प्रहरीले जनाएको हो । आगलागीबाट साहको ४० लाख, मगरको ११ लाख, रेग्मीको २५ लाख र प्रजापतिको आठ लाख गरी ८४ लाख बराबरको क्षति भएको प्रारम्भिक अनुमान गरिएको छ ।
आइतबार बिहान करिब १ः३० बजेको समयमा आगलागी भएको खबर लगत्तै खटिएको सशस्त्र प्रहरी, नेपाल प्रहरी र स्थानीयको सहयोगमा करिब तीन घण्टापछि आगो नियन्त्रणमा लिएको थियो । आगो नियन्त्रणमा त्रियुगा, चौदण्डिगढी नगरपालिका र रौतामाई गाउँपालिकाको दमकल प्रयोग भएको प्रहरीले बताएका छन् ।
BACK TO TOP
