जनमत पार्टीका अध्यक्ष डा.सिके राउतले किसान आन्दोलनको माग सम्बोधन नभए स्थानीय निर्वाचनमा अवरोध गर्ने चेतावनी दिएका छन् । बुधवार वीरगन्जमा आयोजित पत्रकार सम्मेलनमा अध्यक्ष राउतले किसान आन्दोलनको माग सम्बोधन नभई स्थानीय तह निर्वाचनको परिकल्पना गर्न नसकिने बताए । ‘पहिले किसान आन्दोलनको माग सम्बोधन हो । अनि मात्र स्थानीय तहको निर्वाचनको परिकल्पना गरौँ,’ अध्यक्ष राउतले भने, ‘नभए अरू ठाउँमा त भन्न सकिन्नँ । तर तराई–मदेशमा झापादेखि कैलाली कञ्चनपुर सम्म स्थानीय निर्वाचनमा हामी अवरोध गर्नेछौँ ।’
डेढ महिना देखि आन्दोलन जारी रहँदा पनि किसानहरूको मागमा सरकारले चासो नदिएको प्रति अध्यक्ष राउतले दुःख व्यक्त गरे । उनले किसान आन्दोलनमा उठेका मागहरू दीर्घकालीन समाधानका लागि किसानसँग सम्बन्धित विधेयक ल्याएर ठोस कानुन नै बनाउनु पर्ने भएकाले आफूहरूको माग सङ्घीय सरकारसँग रहेको बताएका छन् ।
BACK TO TOP
