टिपरको ठक्करबाट घरको आँगनमा बसेर आगो तापिरहेका दुईको मृत्यु, दुई घाइते

बर्दियामा टिपरको ठक्करबाट बढैयाताल–३ सतपतियामा घरको आँगनमा बसेर आगो तापिरहेका दुई जनाको घटनास्थलमा मृत्यु भएको छ । मृत्यु हुनेमा सोही ठाउँका ४० वर्षीय सोमबहादुर विक र ४७ वर्षीय रामु चौधरी रहेका छन्। साथै सोही ठाउँका ३५ बर्सिया प्रमीला चौधरी र ४० बर्सिया बेलमति थारु समेत गम्भीर घाइते भएका प्रहरीले जनाएको छ । घाइते दुवैको अवस्था चिन्ताजनक भएकोले उपचारका लागि नेपालगन्जस्थित शिक्षण अस्पताल लगिएको प्रहरीले जनाएको छ ।

चालकले अत्यधिक मदिरा सेवन गरी टिपर चलाएकाले अनियन्त्रित भई दुर्घटना भएको प्रहरी नायब उपरीक्षक हेमबहादुर शाहीले बताएका छन् । चालक सुर्खेतको वीरेन्द्रनगरका दुर्गा विकलाई प्रहरीले नियन्त्रणमा लिइएको प्रहरीले बताएका छन् । आफन्त र स्थानीयले चालकमाथि कडा कारबाही र क्षतिपूर्ति माग गर्दै नेपालगन्ज–गुलरिया सडक खण्ड मङ्गलवार बिहानदेखि भोलागौढी खण्डमा चक्काजाम गरेका छन् । टिपर सहित चालक प्रहरीको नियन्त्रणमा रहेका छन् ।