विराटनगरको नोबेल मेडिकल कलेजले एमबिबिएसमा भर्ना भएका विद्यार्थीसँग अतिरिक्त शुल्क लिएको विषयमा जिल्ला प्रहरी कार्यालय मोरङले अनुसन्धान थालेको छ । अनुसन्धान गरेर विद्यार्थीसँग अतिरिक्त शुल्क लिएको पाइए प्रहरीले कलेज सञ्चालकलाई कारबाहीको दायरामा ल्याउने भएको हो । जिल्ला प्रशासन कार्यालयले शुक्रवार आन्दोलनरत विद्यार्थी सङ्गठनसँग छलफल गरेर जिल्ला प्रहरीलाई अतिरिक्त शुल्क असुलेको विषयमा छानबिन गरी कारबाहीको दायरामा ल्याउने निर्णय गरी पत्राचार गरेको थियो ।
पठनपाठन सुरु नै नगरी कलेजले आयोगले तोकेभन्दा विपरीत ४ लाख ८२ हजार अतिरिक्त शुल्क बुझाउन दबाब दिएपछि अभिभावक तथा विद्यार्थीले प्रदेश १ का मुख्यमन्त्री, मन्त्रीदेखि जिल्ला प्रशासनमा ज्ञापन पत्र बुझाएर मङ्सिर १९ गतेदेखि सङ्घर्ष गर्दै आएका छन् ।
जिअ काशीराज दाहालले चिकित्सा शिक्षा आयोगले तोकेभन्दा बढी शुल्क कलेजले असुली गरेको भए कारबाही अघि बढाउन गृह मन्त्रालयले बिहीबार पठाएको पत्रअनुसार प्रहरी कार्यालयलाई कारबाहीका लागि पत्राचार गरिएको बताए । मोरङका प्रमुख प्रहरी उपरीक्षक जनार्दन जोशीले एक साताभित्र अनुसन्धान गरेर अतिरिक्त असुली गरेको पाइए कारबाहीको दायरामा ल्याउने बचन दिए ।
BACK TO TOP
