नागरिक समूहले व्यक्ति हत्याको धम्की दिने भौतिक पूर्वाधार तथा यातायात मन्त्री रेणु यादवलाई पदमुक्त गर्न सरकारसँग माग गरेको छ । माघ ५ गते रौतहटको गौरमा आयोजित एक कार्यक्रममा मन्त्री यादवले सम्बोधन गर्ने क्रममा व्यक्तिहत्या र सामाजिक हिंसा फैलाउने अभिव्यक्ति दिएकोप्रति आपत्ति प्रकट गर्दै केही नागरिकहरूले विज्ञप्ति सार्वजनिक गरेका हुन ।
चैत ३ गते गौरान वर्वर र पाशविक हत्याकाण्डका अभियुक्तलाई न्यायको कठघरामा अझैसम्म उभ्याउन नसकिएको र समाजमा दण्डहीनता कायमै रहेको अवस्थामा मन्त्री यादवको अभिव्यक्तिले उक्त हत्याकाण्डमा निजको दलको समेत सहभागिता भएको स्वीकारोक्ति सार्वजनिक भएको अपिलमा उल्लेख छ ।
मुलुकमा कानुनको शासन कायम छ भन्ने अनुभूति जनतालाई गराउनु सरकारको पहिलो दायित्व भएकाले मन्त्री यादवलाई तत्काल पदमुक्त गरी, कानुनी कारबाहीको दायरामा ल्याउन प्रधानमन्त्री शेरबहादुर देउवाले अग्रसर हुनु पर्ने आवश्यक रहेको उनीहरूले बताएका छन ।
अपिलमा डा. केदानरनरसिंह केसी, चरण प्रसाई, इन्द्र अर्याल, महामुनीश्वर आचार्य, गणेशकुमार मण्डल, सुशील प्याकुरेल, तारानाथ दाहाल र कनकमणि दीक्षितको हस्ताक्षर रहेको छ ।
BACK TO TOP
