कोरोना सङ्क्रमण बढ्दै गएपछि सीसीएमसीको निर्णयअनुसार गृह मन्त्रालयले आजदेखि सार्वजनिक स्थानमा हिँडडुल गर्दा खोप कार्ड अनिवार्य गरेको हो । सार्वजनिक निकायमा सेवा प्राप्त गर्न पनि खोप कार्ड अनिवार्य गरिएको छ । सरकारी कार्यालय, होटेल, रेस्टुरेन्ट, सिनेमा हल, रङ्गशाला, हवाई यात्रा, पार्क आदिमा जाँदा खोप कार्ड बोक्नुपर्ने छ ।
कोरोना सङ्क्रमणको दर बढ्दै गएपछि काठमाडौँ उपत्यकामा आज राति १२ बजेदेखि निजी र सार्वजनिक सवारी साधनहरूमा जोरबिजोर प्रणाली लागू गरिएको छ । सबै प्रकारका आमसभा, जुलुस, सभा, भेला, मेला, सम्मेलन, सिनेमा हल, डान्स बार, दोहोरी, नाचघर, क्यासिनो लगायत बन्द गर्ने निर्णय भएको छ । यस्तै शैक्षिक संस्थाहरूले भौतिक रूपमा पठन पाठन नगर्ने निर्णय भएको छ भने परीक्षाहरू पनि स्थगित गर्ने निर्णय भएको छ । सार्वजनिक स्थलमा भौतिक दुरी कायम गर्न, अनिवार्य मास्कको प्रयोग गर्न, विदेशबाट आउँदा ५ दिन होम आइसोलेसन बस्न पनि स्थानीय प्रशासनले आदेश दिएको छ ।
यस्तै सामाजिक कार्यमा 25 जनाको उपस्थिति हुन छुट दिइएको छ भने पार्टी प्यालेस प्रयोग गर्न प्रमुख जिल्ला अधिकारीबाट पूर्वस्वीकृति लिनुपर्नेछ । यस्तै स्वास्थ्य मापदण्ड पालना गरेर रेस्टुरेन्ट खोल्ने, जोर बिजोरका आधारमा निजी तथा सार्वजनिक यातायात सञ्चालन गर्ने, मास्क नलगाउनेलाई सार्वजनिक यातायातमा प्रवेश नदिने निर्णय पनि प्रशासनले गरेको छ ।
BACK TO TOP
