प्रत्येक वर्ष पुस २७ गते मनाइने राष्ट्रनिर्माता पृथ्वीनारायणको जन्म जयन्ती मङ्गलवार विविध कार्यक्रम आयोजना गरी देशभर मनाइँदै छ । सबै जातजाति, भाषा भाषीको सहयोग लिएर नेपाल एकीकरणको बिस्तार गरेका पृथ्वीनारायण शाहको सम्झनामा आज देशभर विभिन्न कार्यक्रम गरी ३०० औँ जन्म जयन्ती मनाइएको छ । नेपाल प्रज्ञा–प्रतिष्ठान, नेपाल ललितकला प्रतिष्ठान, नेपाल सङ्गीत तथा नाट्य प्रज्ञा–प्रतिष्ठान र सांस्कृतिक संस्थानको आयोजनामा कमलादीबाट सांस्कृतिक बाजागाजासहित सिंहदरबार पश्चिम मूलढोका स्थित पृथ्वीनारायण शाहको सालिकमा जम्मा भई पूर्व राजा ज्ञानेन्द्र शाह द्धारा माल्यार्पण गर्ने कार्यक्रम रहेको छ ।
वि.सं १७७९ पुस २७ गते गोरखाका राजा नरभूपाल शाह र रानी कौशल्यावतीका कोखबाट पृथ्वीनारायण शाहको जन्म भएको थियो । वि.सं १७९९ चैत २५ गते २० वर्षको उमेरमा पृथ्वीनारायण राजा भएका थिए । त्यसअघि नेपाल ५२ राज्यमा विभाजित थियो । पृथ्वीनारायण राजा भएपछि पूर्वमा टिस्टादेखि पश्चिममा चेपे नदीसम्म नेपालको सीमा विस्तार गर्न उनी सफल भएका थिए । पृथ्वीनारायणको शेषपछि उहाँका उत्तराधिकारीले पश्चिममा किल्ला काँगडासम्म नेपाल राज्यलाई विस्तार गरेको इतिहास उल्लेख गरिएको छ । पृथ्वीनारायण शाहले वि.सं १८०१ मा नुवाकोट र त्यसको २५ वर्षपछि १८२६ सालमा काठमाडौँ उपत्यका विजय हासिल गरेका थिए । उपत्यका विजय गरेपछि पृथ्वीनारायण शाहले पूर्वतिरका चौदण्डी विजयपुर आदि विजय गर्दै देशको सिमाना बढाएका र सिङ्गो देशको नाम नेपाल राखिएको इतिहासमा उल्लेख गरिएको छ ।
आज पूर्व राजा ज्ञानेन्द्र शाह सिंहदरबारको मूल गेटस्थित पृथ्वीनारायण शाहको सालिकमा माल्यार्पण गर्न कार्यक्रम रहेको छ । पूर्व राजाका संवाद सचिव फणीराज पाठकका अनुसार पृथ्वी जयन्तीको अवसरमा मङ्गलवार मध्यान्ह साढे १२ बजे माल्यार्पण गर्ने कार्यक्रम रहेको छ
BACK TO TOP
