तालतलैया विकास तथा संरक्षण समितिको निर्वाचनमा खनालको प्यानलै विजयी

इटहरी स्थित तालतलैया विकास तथा संरक्षण समितिको नयाँ नेतृत्वका लागि भएको निर्वाचनमा नेकपा एमाले पक्षको प्यानल नै विजयी भएको छ । नेपाली काङ्ग्रेस र नेकपा एमाले आ-आफ्नो प्यानल बनाएर निर्वाचनमा सहभागी भएका थिए । जसमा एमाले पक्षधर प्यानल नै विजयी भएको छ । अध्यक्षमा एमाले तर्फबाट लक्ष्मी प्रसाद खनाल २ मतले उनका प्रतिद्वन्द्वी नेपाली काङ्ग्रेसका राजु बस्नेतलाई पराजित गरेका हुन् । खनालले ४७ मत पाए भने बस्नेतले ४५ मत पाएका थिए । त्यस्तै उपाध्यक्षमा खनाल प्यानलका कमल कुमार राई निर्वाचित भएका छन् । उनले बस्नेत प्यानलका घनश्याम दाहाललाई १६ मतान्तरले पराजित गरेका हुन् । राईले ५१ मत पाए भने दाहालले ३५ मत पाए । महासचिवमा ५२ मत ल्याउँदै खनाल प्यानलका कुमार सुन्दास चयन भए । बस्नेत प्यानलका रवि ओझाले ३९ मत ल्याए ।
यता सचिव पदमा पनि खनाल प्यानलका कृष्ण प्रसाद दंगाल निर्वाचित भए । उनले बस्नेत प्यानलका उमा आचार्यलाई ७ मतान्तरले पराजित गरेका हुन् । दंगालले ४८ मत ल्याए भने आचार्यले ४१ मत ल्याएका थिए ।
त्यस्तै खुल्ला सदस्यमा पनि खनाल प्यानल नै विजयी भएको छ ।
सदस्यमा खेमराज पोख्रेल, बाल कुमार राई, निरञ्जन गिरी, देवराज मादेन, विनोद कुमार कार्की, काली बहादुर लिम्बु, चन्द्र बहादुर कटुवाल निर्वाचित भए ।
यता महिला सदस्यमा पनि खनाल प्यानलका मुना गुरागाईँ तामाङ, गीता सुवेदी, घनश्याम थापा पाण्डे, गोमा माया तामाङ र अनिल कुमारी राई निर्वाचित भएका छन् ।
लेखा संयोजकमा खनाल पक्षका युग प्रिय निरौलाले जित हासिल गरे । लेखा सदस्यमा होमनाथ नेपाल र मदन प्रसाद शर्मा निर्वाचित भएका छन् । दुवै खनाल प्यानलका हुन् ।
यस अघिको नेतृत्वमा पनि नेकपा एमाले निकट पक्षले नै नेतृत्व गरेको थियो ।