कोभिड अस्पतालमा भ्रष्टाचार भएको भन्दै प्रदर्शन

कोभिड अस्पतालमा भ्रष्टाचार भएको भन्दै प्रदर्शन

जनकपुरधामको मनिपाल शिक्षण अस्पतालमा प्रदेश सरकारले सुरु गरेको ‘कोभिड विशेष अस्पताल’मा व्यापक भ्रष्टाचार भएको भन्दै यूवाहरु आन्दोलित भएका छन् ।

मंगलवार जनकपुरधामस्थित मुख्यमन्त्री तथा मन्त्रिपरिषद्को कार्यालय अगाडी युवाहरुले मुख्यमन्त्री लालबाबु राउतविरुद्ध नाराबाजी गरे । कोभिड विशेष अस्पतालमा गरेको खर्च पारदर्शी गर, भर्ना प्रक्रिया सार्वजनिक गर, मुख्यमन्त्री मुर्दावाद जस्ता नारा युवाहरुले लगाए । मधेस भवन क्षेत्र वरिपरि स्थानीय प्रशासनले निषेधित क्षेत्र तोकेको छ । यद्दपी युवाहरु प्रहरीलाई छल्दै प्रदर्शन गरे । नेकपा एमालेसँग आवद्ध युवा मुन्जय राउतको नेतृत्वमा प्रदर्शन उत्रेका यूवाहरुले खर्च रकम र कर्मचारी भर्ना प्रक्रिया सार्वजनिक नगरे कडा आन्दोलन गर्ने चेतावनी दिएका छन् ।

‘कोभिड विशेष अस्पनाल सञ्चालनको नाममा ९ करोड रुपैया खर्च भएको सुन्दैछु’, प्रदर्शनको नेतृत्व गरेका युवा राउतले भने, ‘तर यतिधेरै रकम खर्च भएको छैन । यसमा व्यापक भ्रष्टाचार भएको देखिन्छ । त्यसैले कहाँ कति खर्च भयो भन्ने कुरा पारदर्शी गर्नुपर्छ ।’ अस्पतालमा कर्मचारी पनि प्रक्रिया पुरा नगरी राखेको यूवाहरुको आरोप छ । ‘कर्मचारी भर्ना गर्दा कुनै मापदण्ड अपनाइएको छैन’, आन्दोलित युवाहरु भन्छन्, ‘कति कर्मचारी राखेको कुरा पनि सार्वजनिक गर्न चाहेका छैन । कतिपय कर्मचारी घरमै बसेर तलब खाइरहेका छन् ।’