फ्रेन्च ओपनबाट डिफेन्डिङ च्याम्पियन बाहिरिइन्

फ्रेन्च ओपनबाट डिफेन्डिङ च्याम्पियन बाहिरिइन्

वोमेन्स सिंगल्सकी डिफेन्डिङ च्याम्पियन इगा स्वियाटेक पेरिसमा जारी फ्रेन्च ओपन टेनिस प्रतियोगिताबाट बाहिरिएकी छन् ।बुधबार भएको क्वार्टरफाइनल खेलमा ग्रीसकी मारिया साकारीले स्वियाटेकलाई पराजित गरेकी हुन् । पोल्यान्डकी साकारीले पहिलो सेटमा २–० को अग्रता लिएर राम्रो शुरुआत गरेकी थिइन् । तर, सेरेना विलियम्सलाई चौथो चरणमा हराएकी साकारीले पुनरागमन गर्दै खेल ६–४, ६–४ ले जितिन् । यो जितसँगै उनी पहिलो पटक ग्रान्डस्लाम सेमिफाइनलमा पुगिन् ।

जारी फ्रेन्चओपनमा वोमेन्स सिंगल्सतर्फ नयाँ ग्रान्डस्लाम च्याम्पियन बन्ने पनि पक्का भएको छ । यसअघि चेक रिपब्लिककी बार्बोरा क्राज्चीकोभा, रुसकी एनास्तासिया पाभल्युचेन्कोभा र स्लोभेनियाकी टामारा जिदान्सेकले पहिलो पटक कुनै पनि ग्रान्डस्लामको अन्तिम चारमा स्थान सुरक्षित गरेका हुन् । क्राज्चीकोभाले प्रतियोगितामा उपाधि दावेदारी भनिएकी कोको गाउफलाई सहजै पराजित गरेकी थिइन् ।यस्तै मेन्स सिंगल्सतर्फ ग्रीसका स्टेफानोस टीसीटसीपास पेरिसमा जारी फ्रेन्च ओपन टेनिस प्रतियोगिताको सेमिफाइनलमा पुगेका छन् । क्वार्टरफाइनल खेलमा टीसीटसीपासले रूसका डानील मेदभेदेभलाई हराएका हुन् । उनले सो खेल ६–३, ७–६, ७–५ को सीधा सेटमा जितेका थिए । योसँगै विश्व वरियतामा पाँचौ वरियता प्राप्त टीसीटसीपासले अन्तिम चारमा एलेक्जान्डर जेभेरेभसँग खेल्ने तय पनि गरे ।

टीसीटसीपासले यो वर्ष जितेका ७ उपाधिमध्ये तीन उपाधि रातो माटोको कोर्टमा जितेका हुन् ।जर्मनीका जेभेरेभले स्पेनका एलेजान्ड्रो डाभीडोभिच फोकिनालाई सहजै हराएका थिए । विश्व वरियतामा छैटो स्थानमा रहेका जेभेरेभ पहिलो पटक ग्रान्डस्लामको अन्तिम चारमा पुगेका हुन् । जेभेरेभ जारी प्रतियोगिताको उपाधि दावेदारीमा रहेका छन् । उनले यसअघि पहिलो पटक ग्रान्डस्लाम प्रतियोगिता फाइनलको रुपमा यूएस ओपन २०२० मा खेलेका थिए । तर, उनी डोमिनिक थिएमसँग पराजित भएका थिए ।