अब देखि कृषकले उत्पादन गरेको तरकारी इटहरी उपमहानगरले बिक्रि गर्न सहजीकरण गरिदिने

अब देखि कृषकले उत्पादन गरेको तरकारी इटहरी उपमहानगरले बिक्रि गर्न सहजीकरण गरिदिने

कृषकले उत्पादन गरेको तरकारी बिक्री नभएपछि इटहरी उपमहानगरले बिक्री गर्ने व्यवस्था मिलाएको छ । सरकारले निषेधाज्ञा जारी गरेसगैं किसानले उत्पादन गरेको तरकारी बिक्री नभई खेतबारीमै कुहिने अवस्था आएपछि उपमहानगरले बजार मूल्य भन्दा प्रतिकेजी २ रुपैंया बढीमा खरिद गर्ने व्यवस्था गरेको हो ।

सोमबार इटहरीमा किसान, इटहरी उपमहानगरका प्रतिनिधि र खरिद गर्ने ब्यवसायीसगँंको त्रिपक्षीय बैठकले यस्तो निर्णय भएको इटहरी उपमहानगरकी उपप्रमुख लक्ष्मी गौतमले जानकारी दिइन् ।

१ क्विन्टल भन्दा माथि उत्पादन गर्ने किसानको खेतमै पुगेर कम्पनीले जिम्मा लिनेछ । यस्तै १ क्विन्टल भन्दा कम उत्पादन गर्ने किसानलाई खरिद गर्ने व्यवसायीको कम्पनी इटहरी १ हलगडामा ल्याएर बिक्री गर्ने प्रबन्ध मिलाइएको उपप्रमुख गौतमको भनाई छ । उनले यसरी सिधा कृषक र व्यापारी जोडिँदा बजार मूल्य भन्दा प्रतिकेजी २ रुपैंया किसानलाई फाइदा हुने बताइन् ।

आफुँले उत्पादन गरेको तरकारी बारीमै खरिद गर्न व्यापारी आउने भएपछि किसान खुसी भएका छन् । बजार मूल्य भन्दा प्रतिकेजी २ रुपैंया बढी दिने निर्णयले म मात्रै नभई सम्पूर्ण किसान खुसी भएको इटहरी १ का विनोद कुमार चौधरीले बताए । बन्दाबन्दीको अवस्थामा कसरी तरकारी बिक्री गर्ने भन्ने समस्या परिरहेको अवस्थामा उपमहानगरले यस्तो निर्णय गरेपछि आफुँलाई हौसला मिलेको अर्का कृषक देव कुमार चौधरीले बताए । उनले सरकारले कृषकको समस्या बुझ्दा मनै देखि खुसी भएको बताए ।