इटहरीका निजि कलेज अनिश्चितकालका लागि बन्द, कुटपिटबाट घाइते भएका सुरक्षा गार्डलाई उपचारका लागि विराटनगर लगियो

इटहरीका निजि कलेज अनिश्चितकालका लागि बन्द, कुटपिटबाट घाइते भएका सुरक्षा गार्डलाई उपचारका लागि विराटनगर लगियो


इटहरीका निजी कलेजहरु अनिश्चितकालका लागि बन्द भएका छन् ।
लकडाउनको अवधिको शुल्क मिनाहा गर्नुपर्ने मागसहित निजी क्याम्पसका विद्यार्थीहरु आन्दोलनमा उत्रिएपछि सञ्चालकहरुलेसमेत अनिश्चितकालका लागि विद्यालय बन्द गर्ने भएका हुन् ।

शुक्रबार उच्च माविहरुको छाता संगठन हिसान सुनसरीले एक विज्ञप्ती जारी गर्दै अर्को सुचना प्रकाशित नहुन्जेलसम्म इटहरीका सम्पूर्ण कलेजहरु बन्द गर्ने जनाएको हो । प्रदर्शनमा उत्रिएका विद्यार्थीहरुको कारण शिक्षक कर्मचारी र विद्यार्थीहरुमा मनोवैज्ञानिक त्रास उत्पन्न भएको अध्यक्ष मुकुन्द घिमिरेले हस्ताक्षर गरेको विज्ञप्तीमा उल्लेख छ ।

शुक्रबार प्रदर्शनमा उत्रिएका विद्यार्थीहरुले इटहरीका चार ठूला कलेजहरु विश्व आदर्श, सुषमा, कस्तुरी र कोशी कलेजका गेटमा सामान्य क्षती पुर्याएका थिए । घम्साघम्सीका क्रममा विश्वआदर्श कलेजका सुरक्षा गार्ड मोहनकुमार अधिकारी आक्रमणमा परेका थिए । हिसानले आक्रमणमा संलग्नलाई कारवाही गर्नसमेत माग गरेको छ । घाइते भएका अधिकारीलाई उपचारका लागि इटहरीको एपेक्स अस्पताल लगिएको थियो । अस्पतालले उपचार गर्न नसक्ने बताएपछि उनलाई हाल विराटछनगरको विराट मेडिकल लगिएको छ ।

साथै हिसानले विद्यार्थी संगठनहरुले जारी गरेको आन्दोलन समर्थित विज्ञप्तीप्रति पनि असन्तुष्टी जनाएको छ । ‘राजनीतिक बलका जिम्मेवार विद्यार्थी संगठनद्वारा जारी पछिल्ला बक्तब्य र प्रेस नोटहरुले पनि यी घटनालाई मलजल गरेको त होइन ?’ विज्ञप्तीमा लेखिएको छ । हिसानले निजी कलेजहरुले कोभिड १९ कै कारण राहत दिन यो वर्ष शुल्कमा वृद्धि नगरेको पनि जिकिर गरेको छ ।

शुक्रबार इटहरी उपमहानगरपालिकाको पहलमा भएको वार्तामा सात दिनभित्र समस्या समाधान गर्ने प्रस्ताव उपमहानगरपालिकाले गरेको थियो । तर विद्यार्थीहरुले प्रस्ताव अस्वीकार गरी क्याम्पसको गेटमा ताला लगाउन पुगेका थिए ।

हिसानले नगर सरकारको पहलमा सुरु भएको वार्ता र संवादको सकारात्मक निचोडका लागि प्रतिबद्धतासमेत जनाएको छ ।